ජපානයේ හිටපු අගමැති ෂින්සෝ අබේ මහතා ඝාතනය කිරීමේ චෝදනාවට වරදකරු වූ ටෙට්සුයා යමගාමි (45) හට ජපාන අධිකරණයක් විසින් ජීවිතාන්තය දක්වා සිරදඬුවම් නියම කර තිබේ. මෙම නඩු තීන්දුව රට පුරා මහත් කතාබහට ලක්වූ අතර, ජපානයේ දේශපාලන ඉතිහාසයේ සුවිශේෂී සිදුවීමක් ලෙස මෙය සටහන් වේ.
2022 වසරේදී ජපානයේ නාරා නගරයේදී පැවති දේශපාලන රැලියකදී අබේ මහතාට වෙඩි තබා ඝාතනය කළ බවට යමගාමි මීට පෙර අධිකරණය හමුවේ පිළිගෙන තිබුණි. මෙම ඝාතනය ජපානය පුරා මහත් කම්පනයක් ඇති කළ අතර, ලොව පුරා දැඩි අවධානයට ලක් විය.
රජයේ නීතිඥවරුන් තර්ක කළේ, මෙම අපරාධය "පශ්චාත් යුධ සමයෙන් පසු ජපාන ඉතිහාසයේ සිදු වූ පෙර නොවූ විරූ සිදුවීමක්" බවත්, එය සමාජයට අතිශය බරපතල බලපෑම් එල්ල කළ බවත්ය. එම හේතුන් මත ඔවුහු යමගාමිට ජීවිතාන්තය දක්වා සිරදඬුවම් නියම කරන ලෙස ඉල්ලා සිටියහ.
කෙසේ වෙතත්, යමගාමිගේ නීතිඥයන් අධිකරණයට දන්වා සිටියේ, ඔහුට ලබා දිය යුතු උපරිම දඬුවම වසර 20ක සිරදඬුවමක් විය යුතු බවයි. එහෙත් අධිකරණය අවසානයේදී ජීවිතාන්තය දක්වා සිරදඬුවම් නියම කිරීමට තීරණය කළේය.